San Miguel nilango ang Blackwater
MANILA, Philippines — Bumangon ang NLEX mula sa 15-point deficit sa third period para balikan ang TNT Tropang Giga, 110-108, sa 2023 PBA Governors’ Cup kahapon sa Philsports Arena sa Pasig City.
Iniskor ni import Jonathon Simmons ang 26 sa kanyang 45 points sa second half para sa 3-0 record ng Road Warriors at sosyohan ang Converge FiberXers sa liderato.
Nag-ambag si Sean Anthony ng 15 markers at tinipa ni Kevin Alas ang huling apat na puntos ng koponan ni head coach Frankie Lim.
Tumapos naman si import Jalen Hudson na may 39 markes sa panig ng Tropang Giga (2-1).
Kinuha ng TNT ang 85-70 abante sa 3:30 minuto ng third quarter bago naagaw ng NLEX ang 99-98 bentahe sa 5:32 minuto ng fourth period.
Ang dalawang basket ni Alas ang nagbigay sa Road Warriors ng 110-106 kalamangan sa huling 41 segundo kasunod ang tirada ni Kelly Williams para idikit ang Tropang Giga sa 108-110 sa 33 segundo.
Bigo si Roger Pogoy na maitabla ang TNT sa kanilang huling posesyon.
Sa unang laro, dumiretso ang San Miguel sa kanilang ikalawang sunod na panalo matapos gibain ang Blackwater, 105-86, tampok ang 22 points ni Jericho Cruz.
Humakot si six-time PBA MVP June Mar Fajardo ng 17 points, 16 boards, 4 assists at 2 steals.
Ipinoste ng Beermen ang 30-point lead, 63-33, sa huling 42 segundo sa second period bago ito naputol ng Bossing (1-2) sa 84-98 sa huling 2:56 minuto ng fourth quarter.
“Like what I always say, if we give other teams a chance to come back, they will take advantage of it,” ani SMB coach Jorge Gallent.