DENVER - Humakot si Luka Doncic ng triple-double na 22 points, 12 assists at 10 rebounds at isinalpak ni Dorian Finney-Smith ang isang go-ahead 3-pointer para pamunuan ang Dallas Mavericks sa 116-115 pag-eskapo sa Nuggets.
Ipinasok ni Finney-Smith ang triple sa huling 17.3 segundo at ang dalawang free throws ni Spencer Dinwiddie ang sumelyo sa panalo ng Dallas (13-11).
Nagkaroon si Nikola Jokic ng tsansang maitabla ang Denver (14-10) sa natitirang 12 segundo, ngunit isa lamang ang naipasok niya sa dalawang free throws.
Sa Cleveland, humataw si Donovan Mitchell ng season-high na 43 points para banderahan ang Cavaliers (16-9) sa 116-102 panalo sa Los Angeles Lakers (10-13).
Nagdagdag ng 24 markers si Jarrett Allen at tumipa si Darius Garland ng 21 points at 11 assists para tapusin ng Cleveland ang four-game winning streak ng Los Angeles.
Tumapos si LeBron James na may 21 points at 17 rebounds para sa Lakers na nakakuha kina Dennis Schroder at Russell Westbrook ng tig-16 points.
Sa Miami, iniskor ni Bojan Bogdanovic ang 28 sa kanyang 31 points sa second half at may 18 markers si Alec Burks para igiya ang Detroit Pistons (7-19) sa 116-96 paggiba ng Heat (11-14).