SAN ANTONIO - Humakot si LeBron James ng season-high 39 points bukod sa 11 rebounds para pangunahan ang Los Angeles Lakers sa 143-138 pagpapatumba sa Spurs.
Dinuplika ni James ang kanyang career high na pitong three-pointers at tumapos na may 11-for-21 field goal shooting kasama ang isang one-handed dunk mula sa lob pass ni Russell Westbrook sa huling minuto ng first half.
Hindi naglaro para sa Los Angeles (7-11) si center Anthony Davis dahil sa kanyang bruised left calf.
Pinamunuan ni Keldon Johnson ang San Antonio (6-15) sa kanyang 26 points at may 23 at 19 markers sina Tre Jones at Devin Vassell, ayon sa pagkakasunod.
Sa Houston, umiskor si Fil-Am Jalen Green ng 28 points sa 118-105 paggiba ng Rockets (5-14) sa Oklahoma City Thunder (8-12).
Sa Phoenix, kumolekta si Deandre Ayton ng mga season highs na 29 points at 21 rebounds sa 113-112 pagtakas ng Suns (13-6) sa Utah Jazz (12-10).
Sa Toronto, humugot si O.G. Anunoby ng 12 sa kanyang 26 points sa fourth quarter para pamunuan ang Raptors (10-9) sa 105-100 pagdaig sa Dallas Mavericks (9-9).