MANILA, Philippines — Siyam na miyembro ng Philippines BEST (Behrouz Elite Swimming Team) ang nakapasok sa national junior team na sasabak sa 44th Southeast Asian Age Group Swimming Championship na idaraos sa Disyembre 17 hanggang 19 sa Kuala Lumpur, Malaysia.
Nangunguna sa listahan si Brent International School standout Micaela Jasmine Mojdeh na beterano na sa mga international competitions.
Kamakailan lamang ay gumawa ng kasaysayan si Mojdeh nang makapasok ito sa semifinals ng prestihiyosong FINA World Junior Championships na ginanap sa Lima, Peru.
Si Mojdeh ang ikalawang Pinoy junior tanker na nakaabot sa semis ng naturang world meet.
Pasok din sa listahan sina Filipino-British Heather White at Ruben White na humahakot ng gintong medalya sa iba’t ibang local at international meets.
Nagkwalipika rin si Imaculate Heart of Mary College-Parañaque Julia Ysabelle Basa na sariwa pa sa kampanya sa Hamilton Short Course Swimming Championships sa Dubai, United Arab Emirates.
Pasok din sina Coby Rivilla, Jenn Sermonia, Alejandro Carandang, Arianna Carandang at Amina Bungubung.
“This achievement brings out your daredevil attitude and inspires others to dream big, beyond your ability. Your game is the game of your team, the game of your supporting,” ani Philippines BEST team manager Joan Mojdeh.
Ang siyam na miyembro ng Philippines BEST ay bahagi ng 99-tanker swimming team na ipadadala ng Philippine Swimming Incorporated sa SEA Age.
Ito ang pinakamalaking delegasyon na binuo ng PSI na naglalayong mabigyan ng exposure ang mga bagitong tankers.
“This is one of our biggest contingent to SEA-Age after the SEA Swimming Federation raised the number of qualifiers to 3 swimmers per event from the previous two swimmers. This will give more swimmers a taste of international competition,” ayon sa post ng PSI sa kanilang social media account.