MINNEAPOLIS - Humakot si center Karl-Anthony Towns ng 25 points at 11 rebounds para banderahan ang Minnesota Timberwolves sa 139-119 paglampaso sa nagdedepensang Milwaukee Bucks.
Umiskor rin si Anthony Edwards ng 25 points para sa pag-okupa ng Timberwolves (42-30) sa No. 7 spot sa Western Conference.
Naglaro naman ang Eastern Conference third-placer na Bucks (44-27) na wala si superstar Giannis Antetokounmpo na may right knee soreness.
Nagdagdag si Naz Reid ng 14 points mula sa bench sa mainitang bakbakan ng Minnesota at Milwaukee na nagtampok sa pagkakatalsik nina Timberwolves’ guard Patrick Beverly at Bucks playmaker George Hill sa first quarter.
Ito ay nang magkabuhol sina Milwaukee center Serge Ibaka at Minnesota forward Taurean Prince matapos ang free throw attempt kasunod ang pakikialam nina Beverly at Hill.
Sa Washington, bumangon ang Wizards (30-40) mula sa 16-point deficit para agawin ang 127-119 panalo laban sa Los Angeles Lakers (30-41).
Sa Cleveland, humataw si Darius Garland ng 24 points at 12 assists sa 113-109 pagtakas ng Cavaliers (41-30) sa Detroit Pistons (19-52).
Sa Charlotte, nagtala si Miles Bridges ng 23 points at nag-ambag si P.J. Washington ng season-high 21 markers sa 129-108 panalo ng Hornets (36-35) sa Dallas Mavericks (43-26).