MANILA, Philippines — Mapupuno ng Pinoy boxers ang bantamweight division matapos magdeklara si International Boxing Federtion (IBF) super flyweight champion Jerwin Ancajas na handa itong umakyat ng timbang.
Naghahanda na si Ancajas na sumampa sa bantamweight division kung saan nais nitong makalaban ang mga top boxers sa naturang division.
Kabilang na sa mga listahan ni Ancajas ang kababayang sina World Boxing Council (WBC) champion Nonito “The Filipino Flash” Donaire at World Boxing Organization (WBO) titlist John Riel Casimero.
Hindi naman na bago si Ancajas sa pagkakataong makalaban ang kapwa Pinoy sa isang world title fight.
Matatandaang nakasagupa na nito si Jonas Sultan noong 2018 sa Fresno, California kung saan nakuha nito ang unanimous decision win para mapanatili ang kanyang IBF crown.
“Sanay na ako makalaban ang kapwa Pinoy sa isang world title fight. Kaya kapag may pagkakataon, gusto kong makalaban ang malalaking boxers tulad ni Donaire,” ani Ancajas.
Nasa bantamweight class din si Japanese fighter Naoya Inoue na nagmamay-ari ng dalawang world titles — ang World Boxing Association (WBA) at IBF belts.
Naghihintay na lamang si Ancajas ng go signal sa kanyang chief trainer na si Joven Jimenez.
Bago tumuntong sa bantamweight, target muna sana ni Ancajas na magkaroon ng unification fight upang magkaroon ng engrandeng exit sa super flyweight division.
“Handa na ako (umakyat ng timbang). Hinihintay ko lang yung decision ni coach kung kailan ang tamang date,” ani Ancajas.