MANILA, Philippines — Pinangalanan ng University of Perpetual Help System Dalta si Mike Saguiguit bilang bagong head coach ng Altas para sa NCAA men’s basketball tournament.
Si Saguiguit ang hahawak sa basketball programs ng Perpetual Help sa juniors at seniors division. Agad nitong pinangalanan si Joph Cleofas para maging head coach ng Junior Altas.
“He will be the new high school coach but I will still look after them as we only have one program,” ani Saguiguit.
Pinalitan ni Saguiguit sa puwesto si dating Perpetual Help head coach Frankie Lim na nagbitiw noong Setyembre.
Nagsimula na sa kanyang bagong tungkulin ni Saguiguit noong Disyembre 1.
“He’s now the coach starting December 1,” ani Perpetual Help liaison officer Anton Tamayo.
Tiwala ang pamunuan ng Perpetual Help sa kakayahan ni Saguiguit at umaasang mas magiging maganda ang kampanya ng koponan sa mga susunod na edisyon ng torneo.
Noong Season 95, nagtapos sa ikapitong puwesto ang Altas tangan ang 5-13 rekord.
Huling nakapasok ang Perpetual Help sa finals noong Season 80.
Ngunit natalo ito sa dating NCAA member na Philippine Christian University sa best-of-three championship series (0-2).