MANILA, Philippines — Isang all-around game ang ginawa ni guard Kiefer Ravena para tulungan ang NLEX na mailista ang unang panalo sa PBA ‘bubble’.
Humakot si Ravena ng 25 apoints, 5 rebounds, 4 assists at 2 steals para akayin ang Road Warriors sa 102-88 paggupo sa NorthPort Batang Pier sa 2020 PBA Philippine Cup kahapon sa Angeles University Foundation Gym sa Angeles, Pampanga.
Tinapos ng NLEX ang kanilang tatlong sunod na kamalasan para sa 1-3 marka at inihulog ang NorthPort sa 0-4 baraha.
“We got a big break with Sean Anthony just not being able to go back in the game,” sabi ni Road Warriors’ coach Yeng Guiao sa Batang Pier forward na nagkaroon ng posibleng right hamstring injury sa first quarter.
Nagdagdag si big man JR Quiñahan ng 17 markers habang may 16 at 10 points sina guards Kevin Alas at Jericho Cruz, ayon sa pagkakasunod, para sa NLEX na kinuha ang 95-78 sa huling 4:30 minuto ng final canto.
Samantala, pipilitin ng TNT Katropa na maitarak ang 5-0 kartada sa pakikipagtuos sa Blackwater (2-2) ngayong alas-4 ng hapon kasunod ang pagkikita ng Rain or Shine (3-0) at Alaska (2-2) sa alas-6:45 ng gabi.