Hidilyn lalahok sa 2021 Vietnam SEA Games
MANILA, Philippines — Maliban sa pagpuntirya sa tiket sa 2021 Olympic Games sa Tokyo, Japan sa Hulyo ay plano rin ni Pinay lady weightlifter Hidilyn Diaz na lumahok sa 2021 Southeast Asian Games sa Ha- noi, Vietnam sa Nobyembre.
At ang susi para makakuha ng gintong medalya sa Olympic Games o SEA Games ay sapat na preparasyon.
“Kasi kung kailangan nating manalo, kung gusto nating manalo sa Olympics, kailangan namin to prepare. We cannot just win sa Olympics without preparing,” wika ni Diaz, ang gold medalist noong 2019 Philippine SEA Games, sa panayam ng Sports Page.
Para masikwat ang Olympic berth sa 2021 Tokyo Olympics ay kailangan lamang ni Diaz, pang-lima sa rankings para sa 55-kilogram category, na lumahok sa isang Olympic qualifier.
Nauna nang nakapagbulsa ng Olympic ticket sina pole vaulter Enest John Obiena, gymnast Carlos Edriel Yulo at boxers Eumir Felix Marcial at Irish Magno.
Bukod kay Diaz, ang iba pang Olympic hopefuls ay sina Southeast Asian Games gold medalist Kiyomi Watanabe ng judo, 2019 world champion female boxer Nesthy Petecio, skateboarder Margielyn Didal, taekwondo jin Pauline Lopez at karatekas Jamie Lim at Junna Tsukii.
Kamakailan ay binigyan ang 29-anyos na si Diaz ng Manny V. Pangilinan Sports Foundation (MVPSF) ng pondong P1.5 milyon para sa kanyang paghahanda sa Olympic qualifier.
Kasalukuyang nagsasanay ngayon ang tubong Zamboanga City sa Kuala Lumpur Malaysia kung saan siya na-stranded dahil sa coronavirus disease (COVID-19) pandemic.
- Latest
