PBA 3x3 committee binuo

MANILA, Philippines — Bumuo na ang Philippine Basketball Association (PBA) ng kumiteng tututok sa 3x3 events ng liga sa oras na magbalik na sa normal ang lahat.

Itinalaga bilang chairman ng PBA 3x3 committee si Alaska team governor Dickie Bachmann para pamunuan ang grupo.

Makakasama nito sina team governors Eric Arejola ng Northport, Raymond Zorilla ng Phoenix, Samahang Basketbol ng Pilipinas 3x3 representative Ronnie Magsanoc at PBA official Joey Guanio.

Kinumpirma ni PBA commissioner Willie Marcial ang pagtatalaga sa mga opisyales ng 3x3 committee.

“We talked the 3x3 and we formed a committee and the chairman was Dickie Bachmann of Alaska,” wika ni Marcial.

Plantsado na sana ang pagtataguyod ng PBA ng 3x3 event sa taong ito.

Subalit naantala ang pagdaraos ng inaugural 3x3 event dahil sa coronavirus disease (COVID-19) pandemic.

Sasabak sana sa natu­rang torneo ang 12 teams sa PBA kasama ang  guest teams na Mighty Bond at Dunkin’ Donuts.

Abril sana ang target date ng PBA para simulan ang 3x3 tournament na lalaruin tuwing Lunes, Miyerkules at Biyernes.

Target ni Bachmann na agad na makipagpulong sa ibang miyembro ng kumite upang masimulan na ang pagpaplano sa mga susunod na hakbang.

Magandang pagkakataon ang 3x3 tournament upang mas mahasa pa ang mga Pinoy cagers dahil mayroon nang 3x3 events sa Olympic Games.

Pinaghahandaan ng Pilipinas ang paglahok sa Olympic qualifying tournament na idaraos sa susunod na taon na magiging tulay para makapasok sa Tokyo Olympics.