Westbrook positibo sa COVID-19
HOUSTON -- Isama na ang pangalan ni Rockets star guard Russell Westbrook sa mga high-profile players sa NBA na nagpositibo sa coronavirus disease (COVID-19).
Ibinunyag ito mismo ni Westbrook, hindi sumabay sa Houston team na nagtungo sa Orlando, Florida para sa restart season, sa kanyang social media account kahapon.
“I’m currently feeling well, quarantined, and looking forward to rejoining my teammates when I am cleared,” ani Westbrook. “Please take this virus seriously. Be safe. Mask up! #whynot.”
Bukod kay Westbrook, hindi rin sumabay si Rockets superstar guard, James Harden sa pagbiyahe ng koponan sa Walt Disney World campus.
Samantala, inihayag ng NBA na dalawa pang player ang nagpositibo sa COVID-19.
Ayon sa liga, umabot na sa 19 players ang nagpositibo sa coronavirus sa isinagawa nilang in-market testing simula noong Hulyo 1.
Nananatili ang nasabing mga players sa kanilang home markets hanggang payagan silang makaalis ng home isolation at makasama sa NBA Campus sa Orlando.
Sisimulan ang restart season sa Hulyo 31 tampok ang 22 koponan.
- Latest