MANILA, Philippines — Haharapin ng San Miguel-Alab Pilipinas ang Singapore Slingers sa ikatlong pagkakataon sa 2019-2020 Asean Basketball League (ABL) sa Sta. Rosa Multi-Purpose Sports Complex sa Sta. Rosa, Laguna.
Bibiyakin ng Alab Pilipinas at Slingers ang 1-1 pagkakatabla sa kanilang head-to-head battle sa pagtutuos nila ngayong alas-7:30 ng gabi.
Pinataob ng tropa ni coach Jimmy Alapag ang Singapore, 90-83, noong Disyembre 15 bago nakabawi ang Slingers, 85-64, sa kanilang rematch noong Enero 12.
Nagmula sa 100-92 panalo ang Alab Pilipinas kontra sa solo leader Thailand Mono Vampire sa Bangkok noong Huwebes.
Dahil sa nasabing panalo ay nanatili ang Alab Pilipinas sa ikatlong puwesto sa 7-4 kartada sa likod ng Mono Vampire (9-4) at Taipei Fubon Braves (9-5).
Malakas din ang tiwala ng Singapore bunga ng kanilang dalawang sunod na panalo kaya umangat sila sa ika-pitong puwesto sa bitbit na 5-5 marka.