MANILA, Philippines — Dalawa pang gintong medalya ang idinagdag ng national obstacle course racing team sa kaban ng Team Philippines upang matikas na walisin ang lahat ng anim na gintong nakataya sa 2019 Southeast Asian Games obstacle course racing kahapon sa Filinvest City sa Muntinlupa.
Nasungkit ng Pinoy bets ang 1-2 finish sa men’s individual 5K x 20 obstacles kung saan pinagharian ni dating national athletics team member Mervin Guarte ang naturang event.
Tinapos ni Guarte ang karera sa bilis na 25 minuto at 31 segundo para masungkit ang unang puwesto.
Nasiguro naman ni Mohammad Sherwin Managil ang pilak na medalya para sa Pilipinas matapos magtala ng 26:26 habang nakatanso si Mohd Pittli Mohd Saddan ng Malaysia na may 28:02.
Ganito rin ang ginawa ng host team sa women’s individual 5K x 20 obstacles.
Pinagreynahan ito ni Sandi Menchi Abahan sa pamamagitan ng impresibong 33:30 habang pumangalawa ang katropa nitong si Glorien Merisco na nagsumite naman ng 40 minuto.
Ibinulsa ni Sorvimane Khamla ng Laos ang tanso hawak ang 55:27 oras.
Nauna nang humirit ng apat na ginto ang national squad.
Nanguna sina Kevin Jeffrey Pascua sa men’s individual 100M x 10 at Rochelle Suarez sa women’s division.
Maliban sa individual events, nakaginto rin ang Pinoy squad sa mixed team assist 400m x 12.