Saints at Skippers nakalapit sa finals seat
MANILA, Philippines — Napigilan ng BRT Sumisip Basilan-St. Clare ang Centro Escolar University, 86-70, sa Game One ng kanilang semifinals series para makalapit sa inaasam na puwesto sa finals ng 2019 PBA D-League Foundation Cup kahapon sa Ynares Sports Arena sa Pasig City.
Sa ikalawang laro, tinalo naman ng Marinerong Pilipino Skippers ang Technological Institute of the Philippines Engineers, 98-80, para kunin ang 1-0 bentahe sa kanilang serye.
Kumuha ng lakas ang Saints kay Malian slotman Mohammed Pare na tumipa ng 19 points at pitong rebounds para buhatin ang kanilang tropa sa 1-0 bentahe sa best-of-three semifinal wars.
Nakalikom naman si Joshua Fontanilla ng 14 points, 6 assists at 5 rebounds, habang naglista sina Junjie Hallare at Jhaps Bautista ng pinagsamang 21 markers para sa Saints.
“Sa start pa lang mas aggressive kami. Ine-expect ko mas aggressive sila pero first quarter pa lang, nakita ko na controlled na namin ‘yung game,” sabi ni Saints head coach Stevenson Tiu.
Nagpasabog ang BRT Sumisip-St. Clare ng 11-0 bomba para makalayo sa 51-37 sa kaagahan ng ikatlong kanto.
Subalit inilabas ng Scorpions ang kamandag nito para makadikit sa 50-55, may 4:28 pa sa naturang yugto.
Agad na sumaklolo sina Bautista ay Leo Gabo nang pumukol ang mga ito ng matatalim na atake para muling hatakin ang Saints sa 82-64 bentahe sa huling tatlong minuto ng laro.
Mula rito ay hindi na lumingon pa ang Saints para makuha ang kanilang ikawalong sunod na panalo.
Nanguna para sa Scorpions si Senegalese center Malick Diouf na may double-double na 12 points at 15 rebounds bukod pa sa 6 steals, 4 assists at 3 blocks.
Nagdagdag naman si Jerome Santos ng 11 markers para sa CEU.
Ang Game Two ay nakatakda sa Lunes.
- Latest