F2 Logistics, Cignal unahan sa 1-0 lead sa Finals
MANILA, Philippines — Mag-uunahang makalapit sa kampeonato ang Cignal at F2 Logistics sa pag-arangkada ng Game One ng Philippine Superliga All-Filipino Conference best-of-three championship series sa Smart Araneta Coliseum.
Magpapang-abot ang HD Spikers at Cargo Movers ngayong alas-6 ng gabi matapos ang battle-for-third match ng Petron at Foton sa alas-4 ng hapon.
Mataas ang morale ng Cignal nang hubaran nito ng korona ang Petron, 25-20, 10-25, 16-25, 27-25, 15-11 at 30-28, 25-21, 17-25, 23-25, 15-8, sa kanilang ‘do-or-die’ semifinals.
At nais ng HD Spikers na maipagpatuloy ang kanilang matikas na ratsada sa finals upang muling makatikim ng kampeonato.
Huling nagreyna ang Cignal noong 2017 sa Invitational Conference.
“This is it. We have completed our climb from fifth place to the championship. We’re excited because we already addressed our lapses. Hopefully, our magical run continues,” ani Cignal coach Edgar Barroga.
Nasandalan ng HD Spikers sina veterans Rachel Anne Daquis at Jovelyn Gonzaga sa kanilang huling dalawang laro katuwang si Filipino-American playmaker Alohi Robins-Hardy.
Hindi rin matatawaran ang naiambag nina Mylene Paat, Jannine Navarro, Ranya Musa at Roselyn Doria gayundin ni libero Jheck Dionela.
Ngunit makakaharap ng Cignal ang F2 Logistics na mayroon ding sariling misyon – ang mabawi ang korona na huli nilang nahawakan noong 2016.
Sariwa ang Cargo Movers dahil ilang araw din itong nakapagpahinga.
Nasungkit ng F2 Logistics ang finals slot matapos igupo ang Foton sa semis noong Martes.
Ipaparada ng Cargo Movers si dating Arizona University star Kalei Mau na top scorer ng koponan.
Makakasama niya sa opensa sina Aby Maraño, Kianna Dy, Majoy Baron, 2016 All-Filipino Conference MVP Ara Galang, playmaker Kim Fajardo at libero Dawn Macandili.
“It’s been a while since we last lifted a PSL crown so my players are really eager to win this one,” ani F2 Logistics coach Ramil de Jesus.
- Latest