MANILA, Philippines — Pakay ng Pinoy esports team na masungkit ang limang gintong medalya sa darating na 30th Southeast Asian Games na gaganapin sa bansa sa Nobyembre 30 hanggang Disyembre 11.
Ito ang inihayag ni Gerald Sobrepena, ang Marketing and Player Development Manager ng Team Liyab Esports kung saan optimistiko ang koponan na makakapag-ambag sila ng medalya sa kampanya ng Team Philippines sa 2019 SEA Games.
“Of the six gold medals at stake in the coming SEA Games, I think we can win five of them. I’m being realistic, kaya natin lima,” ani Sobrepena sa lingguhang Usapang Sports ng Tabloids Organization in Philippine Sports (TOPS) sa National Press Club sa Intramuros, Manila.
Puspusan na ang paghahanda ng mga Pinoy athletes na babanderahan ng mga top players sa bansa.
Ilan sa mga ipaparada ng Pilipinas ay sina Team Liyab standouts Kevin Kio “Gambit” Dizon, Jeremiah “1717” Camarillo, Jervan Lorenzo “Bents” Delos Santos at Miguel Klarenz “Miggie” Banaag.
Lalaban ang apat sa Arena of Valor (AoV) event ng esports competitions sa 2019 SEA Games at sasalang si veteran Caviar “Enderr” Acampado sa StarCraft ll.
Lalaruin din sa biennial event ang Dota 2, Mobile Legends: Bang Bang, Tekken 7 at Hearthstone na kasama ng AoV at StarCraft ll.
Dalawang Pinoy athletes ang isasalang sa individual games na Tekken 7, Hearthstone at StarCraft ll, samantalang pitong players ang sasabak sa matinding team events na Dota 2, Mobile Legends: Bang Bang at Arena of Valor sa 2019 SEA Games.