MANILA, Philippines — Isa lang sa Alaska at Meralco ang uupo sa No. 8 seat sa eight-team quarterfinal round.
Pag-aagawan ng Aces at Bolts ang nasabing tiket sa kanilang playoff game ngayong alas-7 ng gabi sa 2019 PBA Commissioner’s Cup sa MOA Arena sa Pasay City.
Nagtapos na magkakatulad na 4-7 baraha ang Alaska, Meralco at Phoenix, ngunit dahil sa quotient ay nasibak ang Fuel Masters at nakasama sa bakasyon ang Columbian Dyip (3-8) at NLEX Road Warriors (3-8).
Naitakda ng Bolts ang paghahamon sa Aces matapos hatakin ang 95-91 panalo laban sa San Miguel Beermen noong Miyerkules para tapusin ang kanilang five-game losing slump.
“We really need it just to stay alive,” sabi ni Meralco coach Norman Black.
Nagwakas din ang tatlong sunod na ratsada ng five-time PBA Philippine Cup champions.
Ang mananalo sa pagitan ng Aces at Bolts ang sasagupa sa No. 1 TNT Katropang Texters, may hawak ng ‘twice-to-beat’ advantage kagaya ng No. 2 NorthPort Batang Pier laban sa No. 7 Beermen.
Maglalaban naman sa best-of-three series ang No. 3 Blackwater at No. 6 Rain or Shine at ang No. 4 Barangay Ginebra kontra sa No. 5 Magnolia.