Petron sa finals
MANILA, Philippines — Napigilan ng Petron ang magandang simula ng Cignal tungo sa 23-25, 25-17, 25-16, 25-21 panalo para matamis na kubrahin ang tiket sa finals ng Philippine Superliga (PSL) Grand Prix kagabi sa The Arena sa San Juan City.
Muling nasandalan ng Blaze Spikers si wing spiker Stephanie Niemer na humataw ng impresibong 35 puntos galing sa 26 attacks, limang aces at apat na blocks upang tulungan ang tropa na hablutin ang ikapitong sunod na finals appearance sa liga.
“I am so impressed with Cignal but I am more impressed with the way we responded. We knew they will gonna come out playing well especially our first match up against them but I was so impressed with the way we adjusted,” wika ni Niemer.
Nakumpleto ng Petron ang sweep sa best-of-three semifinal series kung saan namayani rin ito sa Game 1 noong Martes sa bendisyon ng 20-25, 25-14, 25-13, 25–18 desisyon.
Ito rin ang ika-17 sunod na panalo ng Petron – ang pinakamahabang winning streak sa liga.
Bahagyang naalog ang Blaze Spikers nang humataw ang HD Spikers sa likod nina Erica Wilson, Anastasia Artemeva at local aces Rachel Anne Daquis at Mylene Paat para makuha ang first set.
“We kept it cool. They were digging some shots that normally scored for us but I’m so impressed with our team tonight and the way we maintained our composure,” ani Niemer.
Ngunit mabilis na nagising ang Petron sa second set makaraang magpakawala si Niemer ng atake sa left wing, opposite side at back row kalakip ang matatalim na aces habang sumuporta si fellow American reinforcement Katherine Bell para maitabla ang laban sa 1-1.
Nakatulong din sina Aiza Maizo-Pontillas at Mika Reyes sa attack line at sina libero Denden Lazaro at Pia Gaiser na salitan sa floor defense.
Ito na ang nagsilbing matibay na pundasyon ng Petron gamit ang solidong depensa sa net para pigilan ang pagtatangka ng Cignal at tuluyang makuha ang panalo.
- Latest
