Beermen nakauna sa Finals

Laro Ngayon(Ynares Center, Antipolo City)

7 p.m. Magnolia vs Rain or Shine (Game 6, semis)

MANILA, Philippines — Nalampasan ng mga Beermen ang pagbangon ng mga Fuel Masters mula sa 25-point deficit sa third period.

Nanatili sa kanilang porma ang nagdedepensang San Miguel para sa 105-94 pagsibak sa Phoenix sa Game Five ng kanilang semifinals series papasok sa 2019 PBA Philippine Cup Finals kagabi sa Cuneta Astrodome sa Pasay City.

“We just got to stay in the course,” sabi ni Alex Cabagnot, namultahan ng P20,000 dahil sa Flagrant Foul Penalty 2 kay RJ Jazul sa Game Four na nagtala ng 22 points at 7 assists.

Itiniklop ng Beermen ang kanilang best-of-seven semis showdown ng Fuel Masters, nanalo sa Game Three, 92-90 sa 4-1.

Magsisimula ang best-of-seven championship series sa Mayo 1. Nagmartsa ang four-time PBA Philippine Cup champions sa kanilang ika-41 finals appearance para sa hangad na pang-26 kampeonato.

Matapos isara ang first half bitbit ang 12-point lead, 51-39  ay umarangkada ang San Miguel sa third period para ibaon ang Phoenix, ang No. 1 team sa eliminations, sa 72-47 buhat sa three-point shot ni Chris Ross sa 6:37 minuto nito.

Dahil sa tiyaga at pagsisikap ay nakadikit ang Fuel Masters sa 94-98 mula sa jumper  ni Matthew Wright sa 2:32 minuto ng final canto bago tuluyang kumulapso.