Green binuhat ang Raptors
ORLANDO, Florida-- Isinalpak ni Danny Green ang isang fade-away jumper sa huling 0.5 segundo ng final canto para tulungan ang bisitang Toronto Raptors na takasan ang Magic, 93-91.
Nakuha ni Green ang inbound pass ni Kyle Lowry sa natitirang 2.3 segundo at ikinonekta ang kanyang winning jumper sa huling 0.5 segundo para akayin sa panalo ang Toronto.
Tumalbog naman ang desperadong tira ni Nikola Vucevic sa panig ng Orlando sa pagtunog ng final buzzer.
Umiskor si Kawhi Leonard ng 18 points para ibida ang Raptors habang may 15, 14 at 13 markers sina Pascal Siakam, Serge Ibaka at Green, ayon sa pagkakasunod.
Pinamunuan naman ni Evan Fournier ang Magic mula sa kanyang 27 points, ang 22 dito ay iniskor niya sa second half.
Sa New York, tumipa si CJ McCollum ng 31 points, habang nagtala si Damian Lillard ng 29 points, 8 assists at 6 rebounds para pamunuan ang Portland Trail Blazers sa 118-114 pagdaig sa Knicks.
Si Evan Turner ang sumelyo sa panalo ng Portland laban sa New York matapos isalpak ang kanyang put back sa huling 9.5 segundo ng fourth period.
Sa Miami, umiskor si D'Angelo Russell ng 20 points samantalang nagposte si Jarrett Allen ng 13 points at 14 rebounds sa 104-92 pagpapatumba ng bisitang Brooklyn Nets laban sa Heat.
- Latest
