MANILA, Philippines — Takot si American Terence Crawford na makaharap si reigning World Boxing Association welterweight champion Manny Pacquiao.
Ito ang isinagot ni Pacquiao sa patutsada ni Crawford noong nakaraang linggo kung saan sinabi ng American boxer na hindi nito itinuturing na champion ang Pinoy superstar kaya malabong magharap ang dalawa sa ibabaw ng ring.
“Takot lang siya (Crawford) matagal na siyang iniiwas sa akin,” ani ng eight-division world champion na si Pacquiao.
Galing si Pacquiao sa seventh-round knockout win kontra kay Argentinian Lucas Matthysse sa kanilang laban noong Hulyo 15 sa Kuala Lumpur, Malaysia para makuha ang WBA belt.
Ngunit hindi na-impress si Crawford sa naturang panalo ni Pacquiao.
“He (Pacquiao) is not a champion in my eyes. He doesn’t have the super belt. That’s the champion in my eyes. I look at the number one champion in the division. I don’t look at the WBC Silver and the interim belts and all that. I look at the super and the actual champion of the division,” ani Crawford sa panayam ng Boxing Scene noong nakaraang linggo.
Sariwa pa si Crawford sa technical knockout win kay Jose Benavidez noong Oktubre 13 sa Omaha, Nebraska para mapanatili ang World Boxing Organization welterweight title.
Tinalo rin ni Crawford si Jeff Horn noong Hulyo 9 via technical knockout.