Mayweather sinimulan na ang pagpapakondisyon
Para sa rematch nila ni Pacquiao
MANILA, Philippines — Seryoso si undefeated Floyd Mayweather na muling bumalik sa ibabaw ng ring.
Nagpahiwatig na si Mayweather matapos mag-post sa kanyang Instagram account na sumailalim ito sa isang linggong training na tila paghahanda sa kanyang pagbabalik aksyon.
“Not bad for one week of training #UNDEFEATED,” ani Mayweather sa kanyang post.
Hinamon kamakailan ni Mayweather si eight-division world champion Manny Pacquiao sa isang rematch sa kanilang pagtatagpo sa Tokyo, Japan.
Subalit lumabas ang bali-balitang nais muna ni Mayweather na magkaroon ng isang tune-up match sa Japan bago harapin si Pacquiao.
Nasa 41-anyos na si Mayweather kaya’t iba na rin ang lebel ng paglalaro nito sa boksing. Ngunit hindi maikakaila na may lakas pa rin ito kung bangis din lang ang pag-uusapan.
Huling nasilayan sa aksyon si Floyd noong Hunyo ng nakaraang taon kung saan itinala nito ang 10th-round technical knockout win laban kay Connor McGregor.
Matapos ang laban, muling nagretiro si Mayweather.
Kita pa rin ang liksi at bilis ni Mayweather para maitala ang impresibong 50-0 rekord.
Sa kabilang banda, sariwa si Pacquiao sa matikas na seventh-round technical knockout win kontra kay Lucas Matthysse ng Argentina sa kanyang WBA welterweight title defense noong Hulyo na ginanap sa Kuala Lumpur, Malaysia.
Dahil sa matikas na pagpapabagsak kay Matthysse, muling nagbalik ang ningning sa pangalan ni Pacquiao kaya’t malaki ang posibilidad na matuloy ang Pacquiao-Mayweather fight na inaasahang muling tatabo sa takilya.
Wala pang pormal na anunsyo ang magkabilang kampo ngunit usap-usapan na magaganap ito sa unang bahagi ng 2019.
- Latest