Mexico sinilat ang Germany
MOSCOW -- Lubhang nahihirapan ang mga defending World Cup champions na makalampas sa group stage at kasama rito ang Germany.
Tinalo ng Mexico ang 2014 champions na Germany, ang World No. 1 seed, na maaaring bumigo sa kanilang hangaring makapasok sa susunod na round.
“We will make it,” wika naman ni Germany coach Joachim Loew. “There’s no reason to fall apart because you lose one game.”
Iniskor ni Hirving Lozano ang nag-iisang goal sa ika-35 minuto mula sa pasa ni Javier Hernandez sa loob ng penalty area para matakasan sina Mesut Ozil at Germany goalkeeper Manuel Neuer.
Ang nasabing goal ang naging final score na hindi inasahan ng Germany.
Sunod na lalabanan ng Mexico ang South Korea at Sweden habang haharapin ng Germany ang Sweden sa Sabado at ang South Korea sa Hunyo 27 para makaiwas sa pagkakasibak sa World Cup.
Ang tatlo sa huling apat na defending World Cup champions ay hindi umabot sa knockout stages.
Ang mga ito ay ang France, Italy at Spain kung saan natalo ang mga French at Spaniards sa kanilang opening matches, habang nakipag-draw naman ang mga Italians.
Hangad ng mga Germans na maging unang koponan na nakapagdepensa ng World Cup title matapos ang Brazil noong 1962, ngunit isang panalo lamang ang naitala sa huli nilang pitong laro.
Huli nilang naisuko ang opening game noong 1982 laban sa Algeria, 1-2. Hindi pa tinatalo ng Mexico ang Germany sa isang competitive match kung saan ang huli ay sa 1-4 noong 2017 Confederations Cup.
- Latest