MANILA, Philippines — Pangungunahan ni Jayson Ramil Macaalay ang four-man national karatedo team na sasabak sa 18th Asian Games ngayong Agosto 18 hanggang Setyembre 2 sa Jakarta at Palembang Indonesia.
Bukod kay Macaalay na isang silver medalist sa nakaraang 29th Southeast Asian Games sa Kuala Lumpur, Malaysia, ang iba pa sa koponan ay sina Junna Tsukii, Mae Soriano at OJ De Loos Santos na kapwa mga bronze medalists naman sa nasabing SEA Games.
Si Macaalay ay nag-silver sa -60-kgs. division ng men’s kumite habang si Soriano ay nag-uwi ng bronze medal mula sa -55-kgs. kumite at si De los Santos naman ay bronze medalist sa men’s individual kata.
Nakamit naman ni Tsukii ang bronze medal sa women’s kumite below 50-kgs. division.
Samantala, ang Asian Games-bound team ay pangangalagaan nina coaches Shin Tsukii ng Japan at Norman Montalvo.
Ito ay nangyari matapos kumalas ang Philippine Karatedo Federation sa dating Iranian coach na si Ali Parvinfar.
Matatandaang nabigo ang national karatedo team na mag-uwi ng gintong medalya sa 2017 SEA Games. Kaya ninais ng PKF na magbago na ng coaches para na rin sa pagbabago ng sistema.