Blue Eagles kontra sa Bulldogs sa finals
MANILA, Philippines — Balik sa Finals ang reigning champion na Ateneo De Manila University matapos patalsikin ang second seed na Far Eastern University sa bendisyon ng 25-19, 18-25, 25-22, 25-18 desisyon sa UAAP Season 80 men’s volleyball tournament kahapon sa The Arena sa San Juan City.
Muling umariba si four-time Most Valuable Player Marck Jesus Espejo makaraang pumalo ng 37 points galing sa 34 attacks at tatlong blocks na sinamahan pa ng 10 excellent digs para pamunuan ang Blue Eagles sa pagmartsa sa Finals.
Malakas din ang suporta ni open hitter Ron Medalla na nag-ambag ng siyam na puntos gayundin sina team captain Karl Baysa at middle blocker Chumason Njigha na may pinagsamang 15 marka para sa Ateneo.
Naging epektibo rin ang kumbinasyon nina setter Ish Polvorosa na gumawa ng 40 excellent sets at libero Manuel Sumanguid na umani ng 25 receptions at 19 digs para sa Blue Eagles.
Nabalewala ang ‘twice-to-beat’ advantage ng Tamaraws sa semis.
Nauna nang umiskor ang Ateneo ng 18-25, 25-13, 24-26, 25-23, 15-9 panalo sa FEU sa kanilang unang paghaharap sa semis noong Sabado.
Makakasagupa ng Blue Eagles ang Bulldogs ng National University para sa best-of-three championship showdown na magsisimula sa Sabado sa Smart Araneta Coliseum.
Ito ang pang-limang sunod na taon na maghaharap ang Ateneo at NU sa Finals kung saan hawak ng una ang 3-1 kalamangan sa kanilang head-to-head.
Naghari ang Bulldogs sa Season 76 at kinuha ng Blue Eagles ang Season 77, 78 at 79.
- Latest