Gumabao hinirang na Bb. Pilipinas-Globe
Kinoronahan bilang Binibining Pilipinas-Globe si Michele Gumabao. (Larawan mula sa Facebook)
MANILA, Philippines — Inilabas ni volleyball superstar Michele Gumabao ang husay nito hindi lamang sa pagrampa maging ang kanyang angking talino upang masikwat ang Binibining Pilipinas-Globe crown sa ginanap na 2018 Binibining Pilipinas coronation night noong Linggo sa Smart-Araneta Coliseum.
Napanganga ang lahat na sinundan ng malakas na hiyawan ang mga manonood dahil sa magandang naisagot ni Gumabao sa question and answer portion ng naturang annual pageant.
Itinanong ng mamamahayag na si Ces Drilon ang “what can you do to fight fake news?”
Walang kaabog-abog na sinagot ito ni Gumabao ng “I know that fake news is rampant nowadays, but, in order to fight this, we must first know what we are reporting, know what we are reading, and, at the same time, be accountable for what we say, especially online. And I hope that media always filters and use their resources to always deliver truth and authentic news.”
Pasok si Gumabao sa Top 15 na nagpasiklab sa swimsuit competition kung saan nakita pa sa telebisyon ang nakangiti at tila proud na si Alyssa Valdez na isa sa mga hurado sa coronation night.
Ipinarada naman ng dating De La Salle University women’s volleyball team member ang kanyang dilaw na gown at nakapusod na buhok na maihahalintulad sa itsura ni Miriam Quiambao nang lumaban ito noong 1999 sa Miss Universe.
Pinangalanang Miss Universe Philippines ang paboritong si Catriona Gray habang Binibining Pilipinas-International si Athisa Manila, Binibining Pilipinas-Supranational si Jehza Huelar na kasintahan ni Magnolia Hotshots player PJ Simon, Binibining Pilipinas-Grand International si Eva Patalinjug at Binibining Pilipinas-Intercontinental si Karen Gallman.
Lalaban si Gumabao sa 2018 Miss Globe na gaganapin sa Albania.
- Latest
