MANILA, Philippines — Namayagpag sina Jan Paul Morales at Jermyn Prado sa criterium races ng Philippine National Cycling Championships for Road na ginanap sa McKinley West sa Taguig City kahapon.
Galing sina Morales at Prado sa kampeonato sa men at women elite road races (massed start) sa Subic, Olongapo City at Bataan noong nakaraang linggo.
Ngunit hindi pa pagod ang Standard Insurance-Philippine Navy bets na sina Morales at Prado nang manguna ang mga ito sa PhilCycling race na nagtampok sa PRU Life UK’s PRUride PH 2018.
Bumandera ang Asian Championship bronze medal winner na si Morales sa one-hour-plus-three-laps criterium race sa 1.10-km circuit kung saan tinalo nito sina national team mainstay at Go For Gold standout George Oconer na mas mabagal ng 1.386 segundo at Dominic Perez ng 7-Eleven Roadbike Philippines na mas mabagal naman ng 1.528 segundo.
“It feels different to be crowned national champion, and I am proud to wear both jerseys,” ani Morales.
Naungusan naman ni Prado si Singapore SEA Games individual time trial gold medalist Marella Salamat sa sprint finish.
Pumangalawa lamang si Salamat habang pumangatlo si Rombaon sa torneong nilahukan ng mahigit 100 cyclists.
Sa men’s under-23, nagkampeon si Aidan Mendoza laban kina silver medalist Ronilla Quita at bronze winner Tomas Mojares.
Nakuha naman nina Jeremy Gene Marana at Irish Wong ang 1-2 finish sa women under-23 category.