MANILA, Philippines — Kasama si naturalized player Andray Blatche, bibiyahe ang 16-man Gilas Pilipinas pool patungong Tokyo ngayong umaga para labanan ang Japan sa Nobyembre 24 sa pagsisimula ng FIBA Asia World Cup 2019 Qualifiers sa Komazawa Gymnasium.
“I’m just looking forward to winning,” sabi ng 6-foot-11 na si Blatche, noong Linggo ng umaga lamang dumating sa bansa para sumama sa ensayo ng Nationals sa Smart Araneta Coliseum. “No matter where we’re at, the main focus is to win.”
Sasailalim ang Pilipinas, Japan, Taipei at Australia sa isang double-round home-and-away series kung saan ang top three teams ang aabante sa susunod na round.
Nasa Group B ang Pilipinas sa ‘home-and-away’ series ng Asian World Cup qualifiers kasama ang Japan, Chinese-Taipei at Australia habang nasa Group D naman ang Iran, Kazakhstan, Qatar at Iraq.
Ang Top Three sa nasabing dalawang grupo ang maglalaban sa susunod na yugto ng torneo.
Ang mapapabilang sa Top Seven mula sa 16 teams sa qualifying event ang makakakuha ng tiket para sa 2019 World Cup sa China.
Bukod kay Blatche, ang iba pang nasa Gilas Pilipinas pool ay sina four-time PBA Most Valuable Player June Mar Fajardo, Jayson Castro, Japeth Aguilar, Raymond Almazan, Kiefer Ravena, Kevin Alas, Calvin Abueva, Carl Bryan Cruz, Matthew Wright, Gabe Norwood, Troy Rosario, Mac Belo, RR Pogoy at Allein Maliksi.
Sa Tokyo ihahayag ni Reyes ang kanyang Final 12 na isasabak sa mga Japanese.
Matapos ang Japan ay haharapin ng Gilas Pilipinas ang Chinese-Taipei sa Nobyembre 27 sa Smart Araneta Coliseum at ang Australia sa Pebrero 22 ng 2018 sa Australia.
“Our main focus is winning. We’ll got to Japan, get a win, come back here and get a win. That’s the goal,” sabi ng 31-anyos na si Blatche, hindi naglaro sa nakaraang 2017 FIBA Asia Cup sa Lebanon bunga ng problema sa seguridad.