KUALA LUMPUR – Sisimulan ng star-studded na billiards squad ang kanilang kampanya sa 29th Southeast Asian Games ngayon dito sa KL Convention Center.
Pinamumunuan nina dating world champions Efren “Bata” Reyes, Dennis Orcollo at Rubilen Amit, sasargo ang 11-man squad sa alas-10 ng umaga kung saan maglalaro sina Reyes at Francisco Dela Cruz sa men’s English billiards.
Sasabak din sa aksyon sina Orcollo at Warren Kiamco sa men’s 9-ball pool doubles, Amit at Cheska Centeno sa women’s 9-ball pool singles at sina Alvin Barbero at Jeffrey Roda sa snookers doubles (Scotch).
Noong 2015 SEA Games sa Singapore ay kumolekta ang mga Filipino cue artists ng 3 gold medals mula kina Carlo Biado at Kiamco (men’s 9-ball doubles); Centeno (women’s 9-ball singles) at Orcollo (men’s 9-ball singles).