Nietes nadale ang unang titulo sa Flyweight, tinalo si Sosa via UD

MANILA, Philippines – Hindi man niya napabagsak si dating Mexican world titlist Edgar Sosa  ay naging impresibo naman ang unang laban ni dating two-division world champion Donnie ‘Ahas’ Nietes sa flyweight division  kahapon sa StabHub Center sa Carson, California.

Dinomina ng 34-anyos na si Nietes ang 37-anyos na si Sosa sa pamamagitan ng unanimous decision victory para angkinin ang World Boxing Organization Inter-Continental flyweight belt.

Nakakuha si Nietes (39-1-4, 22 KOs) ng magkakatulad na 120-108 iskor mula kina judges Max DeLuca, Alenjandro Rochin at Pat Russell para sa kanyang panalo kontra kay Sosa (52-10-0, 30 KOs).

“Hindi ako nagmamadali na i-knockout si Sosa para ma-testing ko lakas ko rito sa 112,” sabi ng tubong Murcia, Negros Occidental na dating nagdomina sa minimumweight at light flyweight divisions ng WBO bago umakyat sa flyweight class.

Muntik nang mapatumba ni Nietes si Sosa, dating naghari sa light flyweight category ng World Boxing Council, sa tenth round nang makakonekta ng solidong suntok sa mukha ng Mexican fighter.

Wala nang nagawa si Sosa, tinalo si Fil-Am B­rian ‘The Hawaiian Punch’ Viloria para sa bakanteng WBC light flyweight crown noong Abril 14, 2007, kundi ang yumakap kay Nietes para makapagpatuloy hanggang round 12.

Dahil sa panalo ay ma­laki ang tsansa ni Nietes na lumaban para sa WBO flyweight crown na binitawan ni unified title-holder Juan Francisco Estrada ng Mexico kamakailan para kumampanya sa super flyweight division.

Umakyat din sa nasabing kategorya si ‘pound-for-pound’ king Roman Gonzalez ng Nicaragua.

Lalabanan ni Nietes ang mananalo sa rematch nina Shiming at Onesongchai sa undercard ng bakbakan nina Sen. Manny Pacquiao at Mexican world welterweight king Jessie Vargas sa Nov.  5 para sa bakanteng WBO flyweight title.

Samantala, pinabagsak ni dating WBO bantamweight ruler ‘King’ Arthur Villanueva (30-1-0, 16 KOs) si  Mexican Juan Jimenez sa second round sa kanilang rematch para angkinin ang WBO Asia Pacific bantamweight belt.

Umiskor naman si Mark “Magnifico” Magsayo (15-0-0, 6 KOs) ng unanimous decision victory laban kay Mexican Ramiro Robles para mapanatiling suot ang WBO International featherweight belt.