MANILA, Philippines – Kinansela ng National Collegiate Athletic Association (NCAA) Management Committee ang mga laro kahapon dahil sa patuloy na pagbuhos ng ulang dala ng bagyong Nona.
Kabilang sa mga ipinagpaliban ang bakbakan sa volleyball, football, lawn tennis at soft tennis.
Kanselado rin ang semifinal games sa National Collegiate Championship sa The Arena sa San Juan City.
Maghaharap sana sa Final Four ang Colegio de San Juan de Letran at San Beda College at ng Far Eastern University at University of San Carlos.
Sa halip, lalaruin ito ngayong araw sa parehong venue.
Ilang mga lungsod sa Kamaynilaan ang binaha dahil sa tuluy-tuloy na pag-ulan. Ayon sa PAGASA, ang Metro Manila ay nasa Signal No. 1.