MANILA, Philippines – Paglalabanan ng Philips Gold at Cignal ang liderato sa 2015 Philippine SuperLiga (PSL) Grand Prix volleyball tournament ngayong hapon sa The Arena sa San Juan City.
Sa ganap na alas-4 ng hapon mapapanood ang tagisan at ang magwawagi ay kakalas sa 3-way tie sa unang puwesto sa ligang inorganisa ng SportsCore na handog ng Asics at Milo bukod sa suporta ng Mikasa, Senoh at Mueller at ipinalalabas sa TV5.
Ang Lady Slammers, HD Lady Spikers at pahingang nagdedepensang Petron Lady Blaze Spikers ay may magkakatulad na 6-2 karta papasok sa huling dalawang laro.
Mahalaga ang makukuhang panalo alinman sa Philips Gold at Cignal dahil puwedeng maging number one ang koponan at ang makakalaban sa cross-over knockout semifinals ay ang number four team.
Sa ngayon ay hawak ng Foton Tornadoes ang ikaapat na puwesto sa 5-3 karta at sila ay mapapalaban sa tampok na laro kontra sa talsik ng RC Cola-Air Force Raiders sa alas-6 ng gabi.