INDIANAPOLIS – Matapos ang halos pitong buwan mula nang mabalian ng binti, tinapos ni Paul George ng Indiana Pacers ang kanyang unang full practice na mas maaga ng tatlong araw sa kanyang iskedyul.
Tinatanong ngayon kung kailan siya maglalaro.
“I’ve got LeBron tomorrow night,” pagbibiro ni George sa pagsagupa ng Pacers laban sa Cleveland Cavaliers sa Biyernes.
Habang walang tsansang mangyayari ito, nakikita naman ang mabilis na pagbangon ng two-time All-Star mula sa kanyang right leg injury sa scrimmage ng US Team.
Bago ang injury ay iginiya ng 24-anyos na forward ang Pacers sa Eastern Conference finals sa nakaraang dalawang seasons.
Sa ilang pagkakataon ay tila ipinakita ni George ang kanyang dating porma.
Nakasabayan niya sa ensayo ang mga regular starters ng Pacers kung saan siya tumipa ng mga long range at midrange shots.