MANILA, Philippines - Apat na Filipino cue-artists na lamang ang palaban sa World 10-Ball Championships na ang knockout round ay gumugulong na sa SM City Mall sa General Santos City.
Matapos ang tagisan sa round-of-64 at round-of-32 ay naiwang nakatayo pa sina Warren Kiamco, Lee Van Corteza, Johann Chua at Carlo Biado.
Ang Derby City 9-Ball champion na si Kiamco ay nanalo kina Karol Skowerski,11-8, at kay fifth seed Darren Appleton,11-5.
Si Corteza ay nanaig kina Albin Ouschan,11-9, at Fu Che Wei,11-8; habang ginulat ni Chua ang mga matitikas na dayuhan na sina Ralf Soquet,11-9, at Wang Can,11-7.
Palaban pa si Biado nang hiyain sina Nick Ekonomopoulos,11-7, at Romero Silvano, 11-2.
Ang tagisan nasa Last 16 na at mababawasan pa ng isa ang panlaban ng host country dahil sina Corteza at Chua ang magkikita sa isang laro.
Kalaban ni Kiamco si Yu Hsuan Cheng at si Biado ay makikipagsukatan kay Radoslaw Babica.