ANGELES CITY, Philippines--Nagpakita si Dominik Guhrs ng Germany ng mahihirap at delikadong tricks para ungusan ang kababayang si Frédéric von Osten sa finals ng premier Open men wakeboard division sa World Cable Wakeboard Championships sa Deca Wakeboard Park Clark.
Tinalo ni Guhrs sina Von Osten at Nick Davies ng Great Britain sa Heat 2 sa semis matapos kumolekta ng 85.33 points sa second run para makapasok sa finals bilang top qualifier.
Humugot naman si Von Osten, nagkampeon sa Tokyo World Cup, ng 75.67 points para sa ikalawang puwesto kasunod si Davies, ang 2010 winner, na may 72.67 points.
Nagposte si Im San ng Korea ng 71.33 points sa kanyang first run para sikwatin ang huling finals berth sa kanyang grupo sa event na suportado ng Rixen Cableways, IWWF Wakeboard 2020 Vision, Smart, Gatorade, Deca Homes, Stoked Inc, RipCurl, Monster Energy Drink, Devant LED TV, Bacardi, Department of Tourism Region 3, Aktion Parks, Plus Event Marketing at inorganisa ng Eventking Corp.
Binanderahan ni Declan Clifford ng Great Britain ang mga riders mula sa semifinal heat 1 sa kanyang average score na 74.33 sa kanyang second run.
Umabante din sa finals si Lior Sofer (71.33) ng Israel, Laszlo Papp ng Hungary (65.67), at Tatsanai Aye ng Thailand (62.33).