TULUYAN na kayang maaabsuwelto at makalalaya na sa mga kinakaharap na drug related cases si Senador Leila de Lima matapos mag-urong ng mga sinumpaang salaysay laban sa kanya ang drug Lord na si Kerwin Espinosa?
Sinabi ni Espinosa na ang kanyang pagdadawit kay De Lima ay dahil sa mga pananakot at panggigipit sa kanya. Sino pa ba ang manggigipit sa kanya kundi ang kalaban o mga kalaban ng senadora na noon pa mang una ay gusto na siyang makalaboso? Kayo na ang humula kung sino.
Noon pa man ay may hinala na ang marami na ang pagsasampa ng kaso laban kay De Lima ay pawang politically motivated. Ginawan pa ng sex video si De Lima na halata namang dinuktor.
Biktima rin ng inhustisya si De Lima dahil nakulong siya nang napakatagal at nakabitin sa ere ang kanyang kaso. Ngayon ay tumatakbo siyang muli sa pagka-senador pero tila nangungulelat sa mga survey. Puwede naman talaga siyang kumandidato kahit anong posisyon dahil hindi pa naman siya matatawag na convicted criminal.
Iyan ang masakit na katotohanan sa Philippine politics. Hindi lang character assassination ang gagawin sa kalaban kundi gagawan pa nang matitinding asunto. Totoo man o hindi ang paratang kay De Lima, dadalhin niya ang latay ng akusasyon hanggang hukay habang may mga naniniwala rito.
Hindi lang siya ang magdurusa kung magkakagayon kundi pati ang mga malalapit niyang kaaanak. Sana, lumabas ang buong katotohanan tungkol kay De Lima.