Ngayong araw na ito ay ginugunita natin ang Pasko ng Muling Pagkabuhay ni Hesus at dala nito ang pag-asang maging maayos ang buhay nating lahat lalo na pagkatapos nating dumaan sa paghihirap dulot ng COVID-19 pandemic at ngayon naman ang sigalot sa pagitan ng Russia at ng Ukraine.
Andun at buhay na buhay ang pag-asa kahit na patuloy tayong humaharap sa anumang krisis na dumarating sa buhay natin. At nitong Semana Santa nga may 149 katao na ang namatay nang tamaan sila ng Bagyong Agaton at may higit 1.9 million katao naman ang na-displaced ng nasabing sakuna.
Sa kabila ng lahat, muli ring nabuhay ang ating mga kandidato sa halalan ngayong Mayo 9 pagkatapos nilang nagpahinga at nagninilay sa paghihirap ni Hesus upang maipakita Niya na kahit anumang hirap, anumang sakit kayang tiisin para sa pag-ibig.
Ganundin sana ang nasa puso ng ating mga pulitiko na isasapuso nila ang mga bunga ng pag-ibig ni Hesus na siyang bunga ng kanyang kamatayan bago man itong Pasko ng Muling Pagkabuhay.
At patuloy nating pagnilayan ang kahalagahan ng buhay ngayon magpahanggang kailanman.
Maligayang Pasko ng Muling Pagkabuhay!