Kapag gumawa ka nang tama, pupurihin kita. Kapag gumawa ka ng mali, lalo na’t magsasaka ang inapi’t inabuso, talagang malilintikan ka.
Sa wakas, ang hinihintay na ipinangakong “allowance” ng Universal Leaf Philippines sa tobacco growers na kanilang kinontrata, nabayaran na.
Last week, kinumpirma ng mga magsasakang nagreklamo sa BITAG na naibigay na ang kabayaran sa kanilang pinagpaguran. Kung hindi pa uupakan, hindi pa maibibigay sa mga pobre ang dapat para sa kanila.
Huwag naman sana laging ganito ang eksena para sa mga Pilipinong magsasaka. Huwag nang umabot sa puntong kailangan nilang manikluhod sa kinauukulan at sa kung sinong may kapangyarihan para lang makuha ang kanilang kabuhayan.
Dahil hinding-hindi magsasawa ang BITAG na ipagtanggol at asistehan ang mga magsasakang inabuso, oras na lumapit sila sa aming tanggapan.
Tigil na ang kalampagan at nagising na mula sa mahimbing na pagkakatulog sa pansitan ang mga awtoridad na dapat noong una pa lang, kumilos na.
Maraming salamat sa munisipyo ng Angadanan, Isabela, sa Philippine Tobacco Administration at lalo na sa Universal Leaf Philippines. Masayang-masaya ang mga magsasakang hinarap n’yo.
Tapos na ang BITAG sa sumbong na ito.
Next: Kayo riyan sa Sky Ranch sa Busuanga, Palawan, mga sagradong baka kayo ha! Paulit-ulit nang sinisira ng mga alaga n’yo ang kabuhayan ng mga magsasaka pero patay-malisya pa rin kayo?! Humanda kayo sa hambalos ng BITAG!