PMVIC dapat tangtangon gyud

Dugay nang naglunang sa daghang kontrobersiya ang Land Transportation Office tungod ning ilang pagkamaayong mangitag paagi nga pagastoon gyo’g dako ang mga motorista ug tag-iyag sakyanan diha sa tinuig nga pagparehistro ug pag-renew niini.

Gikan niadtong gipabayran nilang mga car plate number hangtod ning Private Motor Vehicle Centers nga nagdalag dakong tanghaga, misihag sa mga mata sa katilingban ang usa ka dautan nilang tumong.

Minilyon ka motorista ang gipabayad sa LTO og plate number kay bag-ohon na kuno ang design sugod niadtong Septiyembre 2013.  Apan hangtod karon, daghan pa ang wala makadawat.

Ang LTO naningil daan sa mga motorista og bayad. Unya way bag-ong plate number nga gitunol. Kon nakautang pa kini, unya patungag interest kada bulan, kadako na kaha sa ilang mabayran.

Pero kay naa lagi sa gahom, dili gyod mahilabtan. Ug kutob ra intawon sa bagulbol ang nangaigo sa ilang binuang.

Sama ning gipuno nilang laing purihisyo para sa mga tag-iyag sakyanan, nga mandatory gyod nga ipatsek-ap ang mga behikulong pribado ngadto sa PMVIC nga nakig-tie up o gi-accredit sa LTO.

Maayo gani, kay nakita ug nadungog dayon sa Senado ang mga dagkong buslot sa maong tinonto nga gipalanog-siyaok sa mga giabusong hingtungdan. Ug dihadiha, gimadoan ang LTO nga isuspende.

Kahinumdoman nga ang LTO aduna nay kaugalingong MVIS. Kaniadto pa. Gani, panahon ni kanhi Pres. Gloria M. Arroyo, matud pa sa nagpakabanang grupo sa mga abogado, may gilaing pundo, P800M ang gobiyerno aron ipaayo-improbar sa sistema niini. Unya, nganong gipasa man nila ang maong proyekto ngadto sa mga pribadong negosyante?

Aron lang, nga ang kitang segurado unta mapunta sa gobiyerno, adto na hinuon mahipunta sa nagngangang bolsa sa pribadong sektor nga gikasabot? Dili ba usa kini ka dakong pagtraydor natong mga magbubuhis?

Wala kini kalainan sa water main pipe nga gipanag-iya mismo sa gobiyerno, nga may kabahing gilungagan sa kiriwan ug gibuhatag sangang tubo aron ang tubig nagdagan adto na motipas-sulod sa laing sudlanan. Dili ba usa kini ka pagtraydor? Usa ka hilom nga pagpangawat?

Busa, dili lang dapat suspendihon kining giimbentong PMVIC. Tangtanon gyod! Sa tinuoray lang, emission test igo na. PMVIC? Avenue of corruption kuno kini. So, no way!