Opisina laos na ba sa bagong normal?
Ang mga unang opisina ay sa mga ahensiya ng gobyerno. Namasukan na customs clerks sina rebolusyonaryong Andres Bonifacio sa Maynila at nobelistang Nathaniel Hawthorne sa Massachusetts. Bagot na bagot si makatang Charles Lamb sa mala-gobyernong East India Company sa London. Ang malalanghap lang ay hangin na nakakulong sa apat na pader, liham niya sa kaibigang magbubukid. Ganunpaman tumagal siyang clerk nang 33 taon mula 1822. Nang sa kinalaunan ay obligahin sila mag-sign in at out sa pagpasok o pag-alis at tuwing 15 minutos na pagitan, umangal siya na istorbo ito sa pagbabasa niya ng diyaryo.
Nauna ru’n sa Rome hindi nag-oopisina ang mga eskribo. Tulad ngayon bitbit lang nila ang tablets (bato) at styluses (balahibo). Ugali ng mga sinaunang Romano ang paglilibang o “odium”, imbes na trabaho o “negotium” (negosyo). Nu’ng 110 AD naikuwento ni abogadong Pliny the Younger kay historian Tacitus na minsan imbes na magsulat siya sa palasyo sinasabayan niya ito ng liwaliw – pangangaso ng oso sa gubat.
Nu’ng 20th century nagtayuan ang mga opisinang skyscrapers (kumakayod sa langit). At nu’ng 2001 pinabagsak ni Osama bin Laden ang dalawa sa pinakamataas sa America.
Bago ‘yon nauso sa Kanluran ang work-from-home. Mas mura’t mas maraming nagagawa kaysa makipagrambulan sa public transport papasok at puro miting lang sa opisina. Sa librong “Rich Dad, Poor Dad” pinayo nina Robert Kiyosaki at Sharon Lechter sa mga negosyante na gawing workplace ang dining table sa bahay para ‘di malustay ang tubo.
Sa mundo simula 2014 parami nang parami ang work-from-home. Sino ba naman ang mag-aakala na pabibilisin ng pandemya ng 2020 ang paglipat ng opisina sa bahay-bahay. Ito na raw ang bagong normal maski lumipas ang COVID-19. Sa ilang taon makikita natin kung totoo nga ito.
* * *
Makinig sa Sapol, Sabado, 8-10 ng umaga, DWIZ (882-AM).
- Latest