Huwag tayong mawalan ng pag-asa
Nasa ika-anim na buwan na tayo ng mabigat na krisis na dinaranas ng buong daigdig at wala pang nababanaag na palatandaang huhupa na ang pandemia sa COVID-19. Oo nga’t may mga pagtatangka ang pamahalaan na luwagan unti-unti ang ipinaiiral na community quarantine, subalit ang mga lumalabas na datos araw-araw ay ipinakikitang tumataas ang bilang ng mga dinarapuan ng karamdaman.
Pero ang paglilinaw ng Department of Health, mas mabilis at episyente na ang isinasagawang testing at contact tracing kaya sa paningin ng publiko, dumarami ang kaso ng mga nagpopositibo.
Dahil marahil dito kung bakit halos anim sa bawat sampung Pilipino ang naniniwala na may darating pang mas malubhang sitwasyon. Ito ay batay sa isinagawang survey ng Social Weather Station (SWS) noong Hulyo 3 hanggang 6 ng taong ito.
Halos kalahating taon na ang pandemya sa buong daigdig kaya siguro nawawalan ng pag-asa ang maraming kababayan natin at mahigit na sa limampung porsyento ang “pessimistic” o nawawalan ng pag-asa sa sitwasyon. Nahigitan ng bagong survey ng SWS ang resulta noong Mayo na nagpapakitang 47 porsyento lang ang nawawalan ng pag-asa.
Huwag tayong mawalan ng pag-asa. Ang mapanghahawakan nating batayan para hindi tayo masiraan ng loob ay ang katotohanan na base sa mga estadistika sa buong mundo, napakakaunti ng mga namamatay sa sakit na ito at mas nakararami ang nakaliligtas.
Naniniwala ako hanggang ngayon na bagama’t totoo ang sakit na COVID-19, ginagamit itong panakot ng mga may kapangyarihan sa daigdig para maligwak ang ekonomiya ng mga maliliit na bansa upang sila ang makapaghari. Ngunit kung nasa panig natin ang Diyos, wala tayong dapat katakutan.
- Latest