Idiretso sa Presidente ang panawagan at apela

Tila hindi naging maganda ang dating sa Presidente ang ginawang pagsasapubliko ng Philippine College of Physician at mga kasamahan sa kanilang panawagan.

Ito ‘yung panawagan ng medical frontliners na ibalik muna ang Metro Manila sa enhanced community quarantine (ECQ) kahit sa loob lang ng dalawang linggo.

Tingin ko’y nag-iwan ito nang masamang panlasa sa dila ng Presidente.

Ramdam naman ito ng lahat sa pahayag na binitiwan ng Presidente noong Linggo ng gabi sa kanilang “late night conference.”

Ang punto, puwede naman daw idiretso sa Presidente sa pamamagitan ng liham ang panawagan.

Bakit kailangang isapubliko agad. Sa madaling salita,  protocol, due courtesy ang ibig sabihin ng Presidente.

Para bang ang gobyerno raw, walang ginagawa at inutil­. Kumbaga ang dating sa Presidente ay “rebolusyon­”.

Kung tutuusin, may punto rin naman ang mga medical frontliners na pagod na sila at kinikilala naman ni Presidente Duterte ang hirap at panganib na kanilang hinaharap laban sa covid-19.

Kaya tuloy, bago pa man sumagot ang Palasyo ay may nanguna na. Nagbida-bida na para bang sa kanya inilapit ang panawagan.

Umangkas, sumawsaw at sumakay sa isyu.

Nakahanap ng pagkakataon na puntuhing hindi epek­tibo ang mga ginagawa ng gobyerno – na kung tutuusin, kabilang siya roon.

Kaya ang siste, napupulitika tuloy ang hakbang na gina­wang pagsasapubliko ng panawagan at apela ng medical frontliners.

Malamang ang dahilan, na parang mala-rebelde ang hakbang ng Philippine College of Physician ay sa kagustuhan at panawagan ng karamihan na magbitiw na sa posisyon si Health Secretary Francisco Duque.

Marami na ang umaatungal sa medical community – pribado man o publiko, ganundin ang mga senador at netizen na mag-resign na ang DOH secretary.

Problema lang talaga ng ilan sa ating mga Pilipino, hindi tinatablan.