EDITORYAL - Ipahiya ang mga korap sa Immigration
Marami pang korap sa mga tanggapan ng pamahalaan. Sandamakmak ang mga korap sa Bureau of Immigration at Bureau of Customs. Ang dalawang ahensiyang ito ang nagpapahirap sa Duterte administration. Kahit paulit-ulit ang banta ni President Duterte sa mga korap, tila wala nang epekto at kamandag. Kamakalawa, nabunyag ang “pastillas operations” ng mga tauhan ng Bureau of Immigration sa Ninoy Aquino International Airport. Piniperahan nila ang mga Chinese na magtatrabaho sa Philippine Offshore and Gaming Operators (POGOs), Malayang nakakapasok ang mga Chinese sa bansa. Umaabot umano sa P10-bilyon ang napepera sa pamamagitan ng “pastillas”.
Panahon na para ipahiya ni Duterte ang mga korap sa Immigration. Sinabi ng Presidente noong nakaraang Sabado, na ipagpapatuloy niya ang nakasanayang shame campaign laban sa mga tiwali sa pamahalaan. Hindi raw niya titigilan ang mga korap. Hihiyain niya ang mga ito sa maraming tao. Bibirahin daw talaga niya ang mga ito. Hindi lamang daw business ang mawawala sa mga korap kundi pati na rin ang pants ng mga ito.
Patuloy ang paggawa ng katiwalian sa kabila na may babala na ang Presidente. Kahit pa lantaran ang ginagawang pagpapahiya sa publiko, patuloy pa rin ang mga corrupt sa gobyerno. Masahol pa sa mga buwaya ang corrupt officials na halos wala nang kabusugan. Ang mga buwaya ay tumitigil sa paglamon kapag mayroon nang laman ang tiyan, pero ang mga corrupt sa pamahalaan, walang humpay ang pagpapasasa sa kaban ng yaman. Uubusin lahat ang laman ng kaban.
Sabi pa ng Presidente noon, singaw lamang ng korapsiyon ang kanyang maamoy, sisibakin agad niya ang sangkot na opisyal. Kaya nga sinabi pa niya noon, magkusa nang magbitiw para hindi na niya hiyain. Mas masakit umano kung sa harap nang maraming tao pa niya hihiyain ang sangkot sa katiwalian.
Ngayon ang tamang pagkakataon. Hiyain na niya ang mga taga-Immigration. Maraming gumagawa ng kabulastugan at kawalanghiyaan sa nasabing tanggapan. Kaya pala napakaraming Chinese sa bansa ay dahil maluwag na nakakapasok sapagkat may bendisyon ng mga korap sa Immigration. Upakan na sila!
- Latest