Krisis na sa tubig
NAGLABAS na ng water interruption schedule ang Manila Water sa mga sineserbisyong lugar. At hindi maganda ang hinaharap ng mga taga-Metro Manila. Nasa 6 hanggang 20 oras silang mawawalan ng tubig. Tila bumalik tayo sa mga taon na nawalan din ng tubig sa lungsod. Wala tayong magagawa kundi magtiis. Ang problema ay baka umabot pa raw ng Agosto ang ganitong sitwasyon.
Hindi ba ito nakita ng mga opisyal at tila ngayon lang nagkakagulo hinggil sa rasyunan ng tubig? Na ngayon lang nagtatanong ang mga mambabatas kung anong nangyari? Iimbestigahan daw ng Senado ang sitwasyon, at kung ano ang mga puwedeng gawin. Pero biglaan lang bang bumaba ang level ng tubig sa La Mesa Dam, na parang may humigop? Hindi ba dapat noon pa pinag-usapan ang mga puwedeng gawin kung unti-unti na ngang bumaba ang level?
Ayon sa MWSS, kasalanan ng gobyerno kung bakit may krisis ngayon sa suplay ng tubig sa Metro Manila. Pero ang sinisisi ay ang mga nakaraang administrasyon, dahil hindi sinimulan ang seryosong paghahanap ng panibagong pagkukunan ng tubig para sa lungsod, partikular ang paggawa ng Kaliwa Dam sa Quezon. Matagal na raw planong proyekto ito, pero hindi umuusad dahil sa pagtutol ng ilang grupo. May masasamang epekto raw sa kalikasan, at mapipilitang mawalan ng tirahan ang mga katutubong matagal nang nasa lugar. May mga nababahala rin sa pagkukunan ng pondo sa China para tuluyan nang umusad ang proyekto ngayon.
Nasa krisis na ang Metro Manila. Ayon sa MWSS, ginagawan na nila ng lahat ng paraan, pero ang babala ay mas lalong lalala ang sitwasyon, bago gumanda. May tubig pa nga ang Angat Dam, pero hindi raw puwedeng ibigay lang sa Metro Manila at kailangan din para sa irigasyon. Sana ay dumating nang maaga ang ulan, pero dahil El Niño nga, nasa kamay na talaga ito ng Diyos.
- Latest