EDITORYAL - Matuto sa mga nakaraang bagyo
(Pilipino Star Ngayon) - September 14, 2018 - 12:00am

Ang Bagyong Ompong ang pinakamalakas sa mga bagyong tumama sa bansa ngayong taon. May lakas na 205 kilometers per hour (kph) at may pagbugso na 255 kph. Ayon sa PAGASA, maaaring umabot sa 220 kph ang lakas ni Ompong. Nasa kate­goryang super typhoon si Ompong na mas malakas pa umano sa Bagyong Yolanda na tumama sa Kabisayaan.

Tinutumbok ni Ompong ang Northern Luzon. Bukas, inaasahang magla-landfall ito sa Northern Cagayan at Batanes.

Sinuspende na ang pasok sa mga eskuwelahan at trabaho sa mga probinsiyang maaapektuhan ng bagyo. Inani na rin ang mga palay at lahat ng mga gulay sa Isabela, Mountain Province, Ilocos, Panga­sinan at iba pang probinsiya na maaapektuhan ng bagyo. Dahil sa lawak ng dadaanan ng bagyo, sinus­pende na rin ang klase sa ilang probinsiya sa Central Luzon at maging sa Metro Manila.

Kailangang paghandaan ang bagyong ito. Nga­yong malinaw kung saang lugar ito tatama, dapat maging preparado ang lahat. Ilang araw nang iniaanunsiyo ng PAGASA, na malakas ang paparating na bagyo kaya kailangang maging handa sa pagtama nito. Ayon sa PAGASA, maaaring kasinglakas ng Bagyong Ompong ang bagyong tumama sa Japan noong nakaraang linggo na umabot sa 30 katao ang namatay. Nakapaghanda ang Japan sa bagyo pero marami pa rin ang namatay.

Marami nang nanalasang bagyo sa bansa kung Setyembre at pawang malalakas. Ang Bagyong Ondoy ay nanalasa noong Setyembre 2009 na marami ang namatay dahil sa idinulot na baha. Marami ang hindi nakapaghanda kaya marami ang nanatili sa bubong ng kanilang bahay.

Ang Bagyong Milenyo ay nanalasa noong Set­yembre 2006 na nag-iwan din ng pinsala. Hindi rin nakapaghanda ang marami sa bagyong ito.

Taun-taon, tinatayang 20 bagyo o mahigit pa ang tumatama sa bansa. Pero sa kabila nito, marami pa rin ang hindi preparado. Marami pa ring matitigas ang ulo na kahit pinalilikas na ay ayaw pang iwan ang bahay at ari-arian. Dapat matuto na sa mga nakaraang bagyo. Sumunod sa awtoridad kapag pinalilikas o magkusa na lamang para makaiwas sa trahedya. Huwag isakripisyo ang buhay sa nagnga­ngalit na unos.

SUPER TYPHOON OMPONG
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with