Ano ba ang lungkot? Ito’y nasa isip
ng sinumang taong malalim mag-isip;
Kapag naisip n’yang siya’y nagigipit
tiyak na ang lungkot sa kanya’y kakapit!
May magkasintahang haharap sa altar
habang naglalakad patungong simbahan -
Biglang nagkagulo may nagbabarilan
nabaril ang mutya at biglang pumanaw!
Itong kanyang nobyo ay biglang nanlumo
dahil sa nangyari sa mahal ng puso;
Tatlong araw siyang hindi kumikibo
nang siya’y lapitan hininga ay pugto!
Nakaupo lamang sa kanyang lamesa
iniisip niya’y malaking problema;
Malaki ang utang ng kanyang pamilya
kukunin na ng banko lupa’t bahay nila!
Mga anak niya’y pawang nag-aaral
tiyak mahihinto sa pinapasukan;
Dahil ang problema’y hindi nakayanan
sumakit ang dibdib at biglang namatay!