Kauupo pa lang
HINDI pa umiinit ang upuan ni PNP chief Director General Oscar Albayalde ay may isyu na sa kanya. May mga pulis daw na nagsasalita nang masama laban kay Albayalde sa social media. Ayon kay Albayalde, maaaring makasuhan ng “insubordination” ang mga pulis na iyan. Pinahahanap na nga niya sa Directorate for Information and Communication Technology Management (DICTM) ang mga nasabing pulis. Ayon kay Albayalde, hindi ganyan ang tamang ugali para sa pulis. Hindi dapat dinidisrespeto ang mas mataas na opisyal. Kung may mga reklamo, may mga tamang paraan at proseso ang PNP para ipaabot sa kanya.
Sino naman kaya ang mga iyan, na kauupo pa lang ay may mga reklamo na? Sino kaya ang mga ayaw sa kanya antimano? Alam natin na magiging strikto at mahigpit si Albayalde sa mga pulis. Alam natin na ang paglinis at pagpurga ng mga hindi kanais-nais sa hanay ng PNP ang isa sa mga unang gagawin ni Albayalde. Ipagpapatuloy ang mga “surprise inspection” sa mga istasyon. Kaya sino ang mga ayaw nito? Dapat nga malaman na kung sino ang mga iyan. Baka sila ang tinutukoy ni Albayalde na “masasamang damo”.
At tulad ni Albayalde, may babala rin ang bagong NCRPO chief na si Director Camilo Cascolan. Lahat daw na sangkot sa krimen, umalis na lang. Kauupo lang ng dalawang bagong opisyal, may mga isyu at babala na. Pero ilang beses na rin nating narinig ang babala na iyan mula sa mga bagong upong hepe. Sana ay talagang mahuli ang lahat ng hindi kanais-nais sa kapulisan. Iyan naman ang nais ng mamamayan, para maibalik na rin ang tiwala sa PNP. Kung itutuloy naman ang madugong kampanya kontra iligal na droga, sana ay mga drug lord at supplier na ang mahuli, at hindi lang mga “nanlalaban”.
* * *
Nagkamali ako sa isinulat sa nakaraang kolum na sa Disyembre magbubukas ang Boracay. Oktubre ang planong pagbubukas ng Boracay, dahil anim na buwan itong isasara. Kahapon nag-umpisa nang pagsasara ng island resort.
- Latest
