Sindikato ng NFA rice, nabuhay bang muli?
KAMAKAILAN, sumabog na ang isyu sa rice shortage. Naging mainit ang National Food Authority (NFA) sa pangambang kulang ang supply ng bigas sa bansa.
Sa isang banda, umaaray ang NFA dahil kailangan na raw mag-import ng bigas. Sa kabila naman, nagsasabing sapat daw ang ating supply. May mga personalidad na sinabing huminahon dahil ‘di totoo ang isyu. Isa na roon si Sen. Cynthia Villar.
Pero mga boss, hindi lang ganito kasimple ang isyung ito. ‘Di lang ito basta-basta problema ng kakulangan sa pinakapangunahing bilihin. Ito ang realidad ngayon. Walang laman ang mga imbakan ng NFA at ubos ang supply sa mga palengke. Saan napupunta ang mga bigas? May mga demonyo sa lupa at patuloy na gumagala. Dagdag pa rito, protektado ang mga loko ng kanilang mga padrino.
Tiniktikan noon ng BITAG ang mga truck pandeliver ng NFA. Ang mga lintik, imbes na sa mga palengke pumunta, sa mga dupang na retailers nagbaba ng kargada. Dadayain ang mga bigas at pagmumukhaing hindi NFA ang quality. Gigilingin lang at ililipat ng sako, tan tara ran, commercial rice na! Bebenta ‘to ngayon bilang high-grade rice kuno sa merkado. Ihahalo roon sa lehitimo at talagang commercial-grade ang kalidad.
Sa pag-iimbestiga ng BITAG, nadiskubre naming malawak ang saklaw ng sindikatong ito. At karamihan sa kanila, mga Chinese! Daan-daang sako ang na-recover ng BITAG noon kasama ang mga operatiba. Walang kahirap-hirap, tubong lugaw agad sana ang mga animal.
Sa ganitong sitwasyon, mahihirapan nang mabisto ang mga loko. Kahit ang mga sanay na mata, mahihirapang mapansin kung okay ang bibilhing produkto. Tanong, patuloy pa rin ba ang ganitong kalakaran sa NFA? I don’t know.
Pinasa-pasa lang ng mga sindikato ang kanilang “negosyo” sa kanilang mga anak. Binago lang nang kaunti ang modus para makasabay sa panahon. Walang problema sa amin na balikan ang mga kumag na ‘to nang magtanda. Huhubaran namin sila, magtago man sila sa kanilang lungga.
Kung may napapansin kayong mga ganitong gawain, huwag mag-atubiling magsumbong sa BITAG! Ipagbigay-alam agad sa amin o magsadya sa aming tanggapan.
- Latest