Pebrero na ngayon buwan ng pag-ibig
isang taong singkad nagdaang mabilis;
pero dati pa rin ang ating daigdig
walang nagbabago sa ating paligid!
At tulad ng dati dito sa Pilipinas
mga Pilipino pag ibig ay haling;
nagmamahal sila pero parang lasing
lalaki’t babae madaling magmaliw!
May mga lalaking ang hanap na mutya
malaki ang bahay sa pera’y sagana;
ayaw mag trabaho pag-asenso’y wala
kaya ang pamilya laging lumuluha!
Itong mga mutya’y gayundin ang hangad
kaya hantong nila’y kasawiang palad;
sila’y nagpabaya sa maraming anak
kaya ang mga anak lumaking halaghag!