MANILA, Philippines — Patay ang isang taxi driver habang pumapasada nang dikitan at pagbabarilin ng hindi pa kilalang riding-in-tandem suspects kahapon ng umaga sa Malabon City.
Dead-on-the spot ang biktimang si Ricky Casilo Dilag, 44-anyos, habang tinutugis na ng mga awtoridad ang mga suspek na sakay ng motorsiklo.
Batay sa imbetigasyon nina PStaff Sgt. Jeric Tindugan at PStaff Sgt. Allan Bermejo ng Malabon City Police, nangyari ang insidente dakong alas-10:40 ng umaga kahapon sa Waling-Waling Road, corner Industry Road, Brgy. Potrero ng nasabing lungsod.
Lumilitaw na sakay ng kanyang minamanehong taksi ang biktima nang dikitan ng tandem at barilin ng dalawang beses.
Nagsasagawa na ng follow-up operation ang pulisya sa pangunguna ni PMaj Adonis Sugui upang matukoy ang mga suspek at motibo sa pamamaslang sa taxi driver.